Como facer pasta de dentes natural

Estamos en tempo de crise. De crise viral e vital. De exporse valores, principios e formas de entender o desenvolvemento, tanto persoal, como comunitario. O planeta leva xa moito tempo avisando de que isto non é sostible e de que o home supón un impacto excesivo. É verdade que expor medidas para cambiar de base o noso sistema vital é complicado pero, polo menos, podemos implantar pequenos cambios que sexan mais respectuosos co noso ao redor e supoñan un xesto de complicidade para co planeta que deixamos ás xeracións vindeiras.

Hoxe propoño algo tan sinxelo como facer a nosa propia pasta de dentes. Esta pasta é parecida á comercial (moito menos densa) pero non contamina, non necesita embalaxe e non é prexudicial para ti.

Que ingredientes precisas?

• un tarro de cristal ou vidrio que peche correctamente
• bicarbonato: vale un de supermercado

• aceite de coco: podes atopalo en numerosos supermercados tamén

• vitamina E: podes mercala na farmacia ou parafarmacia; haina en gotas ou píldoras

• aceite esencial de menta: podes mercalo na farmacia ou parafarmacia

• OPCIONAL: xylitolo estevia, para darlle un chisco de dozura. O bicarbonato ten un gusto salgado. Eu aínda non me acostumei, pero recoñezo que, cun chisquiño de xylitol, é máis agradable.

Como se fai?
1.- Introducimos no tarro 3 culleradas soperas de bicarbonato.

2.- Quentamos o aceite de coco no microondas ou ao baño maría. O aceite de coco solidifica rápidamente. Cando esté líquido, engadimos 3 culleradas soperas ao noso frasco. Ten en conta que neste momento a pasta debe estar bastante líquida pero pasadas unhas horas, cando o aceite de coco solidifica, colle unha consistencia moito máis densa. Remexemos ben.

3.- Engadimos a nosa píldora de Vitamina E ou unhas gotas (15 gotas aprox).

4.- Engadimos unhas 15-20 gotas de aceite esencial de menta. En realidade podes empregar o aceite que queras, mais recoméndoche menta porque é o sabor e o olor ao que estás acostumado dende cativo. Doutra banda, este aceite tampouco ten ningunha propiedade en si, polo que, se prefires, non tes por que botalo; ou podes botar menos cantidade.

5.- Por último, engadimos o sobreciño de xylitol ou unhas gotas de estevia, ao gusto e mesturamos de novo.

IMPORTANTE: a pasta debe quedar correctamente pechada. E, non se pode meter o cepillo de dentes no tarro, para que non entren bacterias. Eu uso unha cullerciña de madeira, que é sincelo de lavar, para coller un pouco de pasta de dentes e poñela no meu cepillo.

ACLARACIÓN: eu non son farmacéutica, doctora, cosmetóloga, nin nada relacionado co ámbito da saúde. Esta receta ven de ter visto e probado multitude doutras recetas ata crear a miña propia.

E a desfrutar!